Hafa samband

Samningurinn við sveitarfélögin samþykktur í atkvæðagreiðslu

Starfsfólk sveitarfélaga í 13 aðildarfélögum SGS hafa samþykkt kjarasamninginn sem undirritaður var 1. júlí síðastliðinn í sameiginlegri rafrænni atkvæðagreiðslu. Já sögðu 78,84% en nei sögðu 21,16%. Alls voru 2.515 félagar á kjörskrá en 378 greiddu atkvæði (15% kjörsókn). Starfsgreinsambandið undirritaði kjarasamning í umboði eftirtalinna félaga: AFL – starfsgreinafélag, Aldan stéttarfélag, Báran stéttarfélag, Drífandi stéttarfélag, Eining – Iðja, Stéttarfélagið Samstaða, Stéttarfélag Vesturlands, Verkalýðsfélag Grindavíkur, Verkalýðs- og sjómannafélag Bolungarvíkur, Verkalýðs- og sjómannafélag Sandgerðis, Verkalýðsfélag Snæfellinga, Verkalýðsfélag Suðurlands og Verkalýðsfélag Vestfirðinga.


Atkvæðagreiðslu lýkur í kvöld!

Í kvöld á miðnætti mánudaginn 21. júlí  lýkur atkvæðagreiðslu um kjarasamning Starfsgreinasambandsins (SGS) við Samband íslenskra sveitarfélaga. Atkvæðagreiðslan er sameiginleg fyrir 13 aðildarfélög SGS og fer fram rafrænt. Þeir sem hafa kosningarétt fengu bréf sent heim með kynningarefni, leiðbeiningum um kosningu ásamt lykilorði. Ef einhver vandræði eru skal hafa samband við viðkomandi stéttarfélag eða Starfsgreinasambandið. Nýtum réttinn – greiðum atkvæði!

Kynning á samningnum og atkvæðagreiðsla fer fram hér


Skuld ríkisins við launafólk

Í síðustu kjarasamningum á almenna vinnumarkaðnum, sem undirritaðir voru í desember 2013, var gerð tilraun til að vinna gegn verðbólgu. Í staðinn sætti launafólk sig við minni launahækkanir en ella. Þessi aðferð var umdeild og höfðu ekki allir trú á henni eins og sást þegar samningarnir voru felldir í stórum stíl. Þeir samningar sem voru á endanum samþykktir byggðust þó á sömu hugmyndinni, að besta kjarabótin fyrir launafólk væri að stemma stigu við verðbólgu. Eitt af því sem skipti máli við gerð kjarasamninganna var að ríkið færi í þessa vegferð með aðilum vinnumarkaðarins. Í tengslum við kjarasamningana barst aðilum vinnumarkaðarins opið bréf frá ríkisstjórninni þar sem hún gerði grein fyrir framlagi sínu, meðal annars endurskoðun á gjöldum og að gjaldskrárhækkanir yrðu innan við 2,5%. Þetta bréf skipti máli við frágang kjarasamninganna.


Ertu verktaki eða starfsmaður?

Það er mikill munur á því að vera launamaður eða verktaki og mikilvægt að fólk átti sig á í hverju munurinn felst. Sem launamaður ertu með ráðningasamning og safnar réttindum á vinnumarkaði, atvinnurekandinn sér um að greiða af þér skatta og þess háttar og þú ert varinn af lögum sem launamaður. Ef þú ert verktaki ertu í raun að selja þjónustu og þú átt í viðskiptum án þess að njóta réttinda sem launamaður eða ávinna þér slíkt. Því miður er þessu stundum ruglað saman og launamönnum boðið uppá að vera verktakar.


Atkvæðagreiðsla vegna nýs kjarasamnings

Dagana 11.-22. júlí næstkomandi fer fram atkvæðagreiðsla vegna nýs kjarasamnings SGS við Samband íslenskra sveitarfélaga, sem undirritaður var þann 1. júlí sl. Í þetta skiptið verður atkvæðagreiðslan með rafrænum hætti og fer hún fram á vef Starfsgreinasambandins, www.sgs.is. Í dag fá allir kosningabærir aðilar sent bréf þar sem má m.a. finna leiðbeiningar um rafrænu atkvæðagreiðsluna. Með bréfinu fylgir jafnframt kynningarbæklingur um samninginn.


Félagsliðar á Norðurlandi hittast

Boðað var til samráðsfundar félagsliða á Norðurlandi til að ræða launamál, stöðu félagsliða og framtíðarsýn. Á fundinn mættu 13 félagsliðar þrátt fyrir skamman fyrirvara og sumarfrí.

Hugur var í félagsliðum að kynna betur námið og störf sem félagsliðar sinna en það vill brenna við að félagsliðanámið sé ekki metið til launa og ekki sé auglýst eftir félagsliðum sérstaklega. Ákveðið var að ráðast í kynningarátak um menntun og störf félagsliða og koma á samráðsvettvangi fyrir þá fjölda félagsliða sem lokið hafa námi og eru starfandi á Norðurlandi.

Á fundinum var rætt um þá baráttu félagsliða sem hefur verið fyrir því að fá starfsheitið löggilt enda er það talinn þáttur í því að lyfta stéttinni bæði í virðingu og launum. Ljóst er að félagsliðar á Norðurlandi munu láta til sín taka í stéttarbaráttunni næsta vetur. Ákveðið var að boða til næsta samráðsfundar seinni partinn í september.


Samið við sveitarfélögin

Starfsgreinasamband Íslands undirritaði samninga við Samband Íslenskra sveitarfélaga í gærkveldi fyrir hönd þrettán aðildarfélaga sinna (AFL starfsgreinafélag, Aldan stéttarfélag, Báran stéttarfélag, Drífandi stéttarfélag, Eining-Iðja, Stéttarfélag Vesturlands, Stéttarfélagið Samstaða, Verkalýðs- og sjómannafélag Bolungarvíkur, Verkalýðs- og sjómannafélag Sandgerðis, Verkalýðsfélag Grindavíkur, Verkalýðsfélag Snæfellinga, Verkalýðsfélag Suðurlands og Verkalýðsfélag Vesfirðinga).