Hafa samband

Nýr samningur undirritaður

Alþýðusamband Íslands og Samtök atvinnulífsins hafa undirritað nýjan samning sem felur í sér viðbætur við þær hækkanir sem samið var um á síðasta ári á hinum almenna vinnumarkaði. Samningurinn byggir á rammasamkomulagi aðila vinnumarkaðarins frá 27. október 2015 og bókun um lífeyrisréttindi frá árinu 2011 og er ætlað að tryggja jafnræði í kjaraþróun á grundvelli sameiginlegrar launastefnu og jöfnun lífeyrisréttinda. Björn Snæbjörnsson formaður Starfsgreinasambandsins fer með umboð 15 aðildarfélaga sambandsins og undirritaði samningin fyrir þeirra hönd. Önnur aðildarfélög sambandsins undirrituðu samninginn einnig (Stéttarfélag Vesturlands og Flóabandalagið).


KLUKK – tímaskráningarapp fyrir snjallsíma

Starfsgreinasambandið vill vekja athygli á nýju appi sem kallast Klukk, en um er að ræða tímaskráningarapp sem hjálpar launafólki að halda utan um sínar vinnustundir. Þannig má á auðveldan hátt nálgast yfirlit yfir unna tíma í mánuði og bera saman við greiddar vinnustundir á launaseðli og ganga þannig úr skugga um að þú fáir rétt greitt frá þínum launagreiðanda.


Framkvæmdastjórn SGS á ferð og flugi

Framkvæmdastjórn Starfsgreinasambandsins hélt tveggja daga fund á Akureyri og Húsavík í vikunni, en um var ræða þriðja fund nýrrar framkvæmdastjórnar sambandsins sem kosin var á þingi SGS í október síðastliðinn. Alls sitja sjö í framkvæmdastjórn SGS, en auk stjórnarmanna tóku starfsmenn sambandsins þátt í fundinum, en þeir eru tveir.


Formannafundur SGS

Í dag, 8. janúar, hélt Starfsgreinasambandið formannafund og var hann að þessu sinni haldinn í höfuðstöðvum sambandsins í Reykjavík. Til fundarins voru boðaðir formenn allra aðildarfélaga sambandsins, 19 talsins og var mæting góð.

Ýmis mál voru á dagsská fundarins að þessu sinni, m.a. erindi frá Ernu Bjarnadóttur, hagfræðingi Bændasamtaka Íslands um utanaðkomandi áhrif á matvælaframleiðslu, innflutningsbann Rússa og tollasamningurinn, kynning á nýrri námsskrá í fiskvinnslu og ýtarleg umfjöllun um svarta atvinnustarfsemi. Þá var farið yfir verkefnin sem framundan eru hjá Starfsgreinasambandinu.


Allt um starfsmatið á nýrri heimasíðu

Nú eru aðgengileg svör við öllu sem þú vildir vita um starfsmatið en þorðir ekki að spyrja. Ef þú ert starfsmaður hjá sveitarfélagi og raðast í launaflokka út frá starfsmati er rétt að kynna sér þessa heimasíðu: http://www.starfsmat.is/. Á síðunni má finna almenna fræðslu um starfsmatið, forsendur fyrir því hvernig störf eru metin og hvaða ferli fer í gang þegar óskað er eftir endurmati á störfum.


Kennitöluflakk veldur miklu samfélagslegu tjóni

Alþýðusambandið fagnar þeirri umræðu sem skapast hefur í framhaldi af ábendingum ríkisskattstjóra í nýjasta tölublaði Tíundar um það mikla samfélagslega tjón sem skattaundanskot og þá ekki síst kennitöluflakkið veldur. Niðurstaða ríkisskattstjóra er að það vanti 80 milljarða á ári upp á þær skatttekjur sem umsvifin í þjóðfélaginu gefa tilefni til.


Gleðilegt ár!

Starfsgreinasamband Íslands óskar öllum landsmönnum gleðilegs árs og þakkar fyrir stuðninginn og samstarfið á síðasta ári. Árið 2015 var ár átaka á vinnumarkaði og Starfsgreinasambandið fór fyrir skýrri kröfu um að hækka lágmarkslaun þannig að þau næðu 300 þúsund krónum innan þriggja ára. Mörgum fannst krafan hógvær en engu að síður þurfti umfangsmestu átök síðari tíma til að ná þessu markmiði. Með samvinnu, samstöðu og stuðningi þjóðarinnar tókst það í samningum sem voru undirritaðir á vordögum. Þá var einnig samið sérstaklega um hækkanir til handa fólks í fiskvinnslu sem var sett á oddinn í kröfum Starfsgreinasambandsins ásamt hækkun lægstu launa.