Hafa samband

Ráðstefna um lífsgæði og kjör starfsfólks í hlutastörfum og vaktavinnu

Starfsgreinasamband Íslands boðar til ráðstefnu þann 12. janúar 2017 um lífsgæði og kjör starfsfólks í hlutastörfum og vaktavinnu. Sjónum verður beint að því hvort starfsfólk velur sér sjálft þessi störf og hvaða áhrif störf sem eru ekki með hefðbundinn vinnutíma hafa á lífsgæði fólks. Hvað getur starfsfólk gert til að draga úr streitu í vaktavinnu? Getur fólk valið að vinna fulla vinnu eða eru hlutastörf dulbúin kjaraskerðing? Hvernig eru kynjahlutföll meðal starfsfólks með óhefðbundinn vinnutíma? Hefur óhefðbundinn vinnutími áhrif á heilsu starfsfólks og þá hvernig? Þessum spurningum og fleiri verður velt upp á ráðstefnunni en dagskráin er blanda af reynslusögum starfsfólks, kynning á niðurstöðum nýlegra rannsókna og umfjöllun sérfræðinga um hvernig draga megi úr neikvæðum áhrifum óhefðbundins vinnutíma. Ráðstefnan fer fram á Hotel Natura og hefst hún klukkan 12:30 og stendur til 16:30.


2,4% atvinnuleysi í nóvember

Samkvæmt vinnumarkaðsrannsókn Hagstofu Íslands voru að jafnaði 201.900 manns á aldrinum 16–74 ára á vinnumarkaði í nóvember 2016, sem jafngildir 84,2% atvinnuþátttöku. Af þeim voru 197.200 starfandi og 4.800 án vinnu og í atvinnuleit. Hlutfall starfandi af mannfjölda var 82,2% og hlutfall atvinnulausra af vinnuafli var 2,4%. Samanburður mælinga fyrir nóvember 2015 og 2016 sýnir að atvinnuþátttakan jókst um 1,3 prósentustig. Fjöldi starfandi jókst um 11.500 og hlutfallið af mannfjölda hækkaði um 2,2 stig. Atvinnulausum fækkaði um 2.100 manns og hlutfall þeirra af vinnuaflinu lækkaði um 1,2 prósentustig.

Lesa má nánar um framkvæmd og aðferð rannsóknarinnar á vef Hagstofunnar.


Jólakveðja SGS

Starfsgreinasamband Íslands sendir öllum landsmönnum bestu óskir um gleðirík  jól og von um ríka samstöðu á nýju ári.

Vakin er athygli á að skrifstofa SGS verður opin milli jóla og nýárs skv. venjulegum opnunartíma (09:00-16:00). Jafnframt er hægt að hafa samband við starfsfólk SGS í gegnum tölvupóst (sgs@sgs.is).


Niðurstöður könnunar Flóabandalagsins – aukin tækifæri og meira starfsöryggi

Niðurstöður árlegrar Gallup-viðhorfskönnunar meðal félagsmanna Flóans liggja nú fyrir. Að þessu sinni bættist fjórða stéttarfélagið í hóp Flóafélaganna – Stéttarfélag Vesturlands, en Efling, Hlíf í Hafnarfirði og VSFK í Keflavík hafa um árabil framkvæmt sameiginlega viðhorfskönnun. Niðurstöðurnar hafa mikla þýðingu fyrir stefnumótun félaganna þar sem að þær endurspegla viðhorf félagsmanna til kjaramála og annarra mikilvægra mála sem koma að starfi stéttarfélaganna. Könnunin nú var framkvæmd fyrir samningssvið bæði almenna og opinbera markaðarins eins og venja er, en rétt er að taka fram að á síðasta ári var könnunin eingöngu framkvæmd fyrir almenna markaðinn þar sem að niðurstöður kjarasamninga á opinbera sviðinu lágu ekki fyrir þegar könnunin fór fram.


Gáttin – Ársrit Fræðslumiðstöðvar atvinnulífsins

Nýlega kom Gáttin, ársrit um framhaldsfræðslu, út í þrettánda sinn en Gáttin er vettvangur umræðu um nám fullorðinna og starfsmenntun á Íslandi og er gefin út af Fræðslumiðstöð atvinnulífsins ár hvert í tengslum við ársfund fræðslumiðstöðvarinnar. Markmið ársritsins er að efla umræðu um framhaldsfræðslu á Íslandi. Enn fremur safna saman og miðla reynslu og kynna það sem efst er á baugi í kennslufræðum, kenningum, námsleiðum, nýjum bókum, gögnum, tækjum og vefsíðum.


Síðasti formannafundur ársins

Næstkomandi föstudag (9. desember) heldur Starfsgreinasambandið sinn síðasta formannafund í ár og fer hann að þessu sinni fram í Reykjavík. Um er að ræða fimmta formannafund SGS í ár, en til fundarins eru boðaðir formenn aðildarfélaga SGS, alls 19 talsins. Á fundinum verða ýmis mál tekin fyrir og má þar á meðal nefna lífeyrismál, vinnustaðaeftirlit, niðurstöður þings ASÍ o.fl. Áætlað er að fundurinn standi frá kl. 13:00 til 16:00.