Að gefnu tilefni vill Starfsgreinasambandið minna á að í kjarasamningi milli aðildarfélaga ASÍ o.fl. og SA frá 21. janúar 2016 var kveðið á um hækkað mótframlag atvinnurekenda í lífeyrissjóð frá og með 1. júlí 2016. Í kjarasamningnum var kveðið á um þrepaskipta hækkun mótframlags atvinnurekenda í lífeyrissjóð og tók fyrsta breytingin gildi 1. júlí sl. Hækkunin gildir um þá sem eru aðilar að framangreindum kjarasamningi. Framlag atvinnurekenda í lífeyrissjóð hækkar og verður eftirfarandi: 2016: Framlag atvinnurekenda hækkar 1. júlí 2016 um 0,5% og verður 8,5%. 2017: Framlag atvinnurekenda hækkar 1. júlí 2017 um 1,5% og verður 10%. 2018: Framlag atvinnurekenda hækkar 1. júlí 2018 um 1,5% og verður 11,5%. Frá og með 1. júlí 2016 hækkar því mótframlag launagreiðenda úr 8% í 8,5%. Þeir atvinnurekendur sem hafa ekki gert viðeigandi breytingar í launakerfum sínum nú þegar eru hvattir til að gera slíkt hið fyrsta.