Síðasti formannafundur ársins
Í dag hélt Starfsgreinasambandið formannafund í þriðja og síðasta skipti á árinu 2017 og fór hann að þessu sinni fram í höfuðstöðvum sambandsins í Reykjavík. Til fundarins voru boðaðir formenn allra aðildarfélaga sambandsins, 19 talsins.
Ýmis mál voru á dagskrá fundarins. Þar á meðal má nefna umræður um viðbrögð aðildarfélaganna við umræðu um kynferðisleg áreitni á vinnustöðum og innleiðingu aðgerðaráætlana þess efnis. Vigdís Jónsdóttir, framkvæmdastjóri VIRK Starfsendurhæfingarsjóðs, fræddi viðstadda um stöðuna varðandi aukna atvinnutengingu í starfsendurhæfingu. Þá voru niðurstöður nýafstaðins kjaramálaþings SGS ræddar, sem og starfsáætlun sambandsins og verkefnin framundan.