Í byrjun nóvember hófst nám fyrir þernur í gegnum samstarfsverkefni Starfsafls fræðslusjóðs, Eflingar stéttarfélags, Samtaka ferðaþjónustunnar, IÐUNNAR fræðsluseturs og hótelanna Icelandair Hotels og Center Hotels. Markmið námsins er að auka faglega færni herbergisþerna í starfi. Námið er samtals 60 kennslustundir og skiptist í tvær jafn langar 30 kennslustunda lotur. Möguleiki er að bæta þriðju námslotunni við þar sem áhersla er á þjónustu og móttöku gesta. Kennslan í fyrstu lotunni hófst þann 4. nóvember sl. og lýkur 2. desember nk. Önnur námslota hefst síðan í janúar. Kennslan fer fram á ensku en stefnt er að því að halda námskeiðin einnig á pólsku og íslensku, allt eftir markhópum. Í fyrstu lotu er áhersla á námsþætti eins og hópefli, liðsanda og jákvæð samskipti, áhættu í starfi öryggismál og skyndihjálp, líkamsbeitingu, samskipti og boðleiðir, vinnuumhverfi, réttindi og skyldur starfsmanna, herbergisþrif, staðlar og fl. Í annarri lotu verður áhersla á sjálfsstyrkingu, samskipti við gesti, ólíka menningarheima o.fl. Í þriðju lotu er fjallað um móttöku og þjónustu í veitingasal, morgunverðarhlaðborð, matvælaöryggi o.fl. Að lokinni tilraunakennslu verður farið yfir námskrána aftur og síðan verður námið boðið öllum hótelum og gistiheimilum sem hafa áhuga.