Vinnumálastofnun spáir auknu atvinnuleysi í janúar

Í nýliðnum desember var skráð atvinnuleysi á landsvísu 4,4% og jókst því um 0,1% frá síðasta mánuði. Í desember 2024 var atvinnuleysið 3,8% og hefur því aukist um 0,6 prósentustig á einu ári.

Þetta kemur fram í mánaðarskýrslu Vinnumálastofnunar. Þar kemur einnig fram að að meðaltali voru 9.043 manns atvinnulausir í desember, þ.e. 5.428 karlar og 3.616 konur. Þá jókst meðalfjöldi atvinnulausra um 294 manns milli mánaða. Mest var atvinnuleysið á Suðurnesjunum í desember eða 8,9% og hækkaði úr 8,6% frá fyrra mánuði. Á Norðurlandi eystra var skráð atvinnuleysi 3,6% en best var atvinnuástandið á Norðurlandi vestra eða 1,6%

Einnig hefur orðið aukning á langtímaatvinnuleysi á milli ára. Alls höfðu 1.757 atvinnuleitendur verið án atvinnu í meira en 12 mánuði í lok desember. Í desember 2024 var fjöldi þeirra hins vegar 1.319 og nemur fjölgunin 438 á milli ára. 

Þá spáir Vinnumálastofnun því að í janúar muni atvinnuleysi hækka og verði um 4,6-4,7% á landsvísu.

Fyrir liggur að aukið atvinnuleysi hefur bitið marga félagsmenn innan vébanda SGS og hafa margir þeirra misst atvinnuna síðustu misseri. Helst er að nefna rekstarstöðvun kísilmálmverksmiðju PCC á Bakka, þar sem hátt í 200 manns misstu vinnuna á síðasta ári. Einnig leiddi bilun hjá Norðuráli á Grundartanga til fjöldauppsagna

Í sjávarútvegi blasir einnig við alvarleg staða, t.a.m. var 48 manns sagt upp í fiskvinnslu ásamt 20 sjómönnum í Vestmannaeyjum og vegna afnáms stjórnvalda á línuívilnun og skerðingar á byggðakvóta á Vestfjörðum.