Aðalfundur Verkalýðsfélags Suðurlands var haldinn að Heimalandi, Vestur-Eyjafjöllum, þann 27.apríl síðastliðinn. Fyrir utan hefðbundin aðalfundarstörf áttu sér stað formannaskipti í félaginu. Már Guðnason lét af embætti eftir að hafa gengt hefur formennsku í félaginu frá stofnun þess árið 2001 og við tók Guðrún Elín Pálsdóttir. Enginn bauð sig fram á móti Guðrúnu til formanns félagsins og var hún því sjálfkjörin. Aðspurð segir Guðrún að henni lítist vel á nýja embættið og hlakki mikið til að takast á við þau fjölmörgu verkefni sem bíða hennar. Hún býst jafnframt við að starfið verði afar krefjandi, enda búið að vera í fjölmörg ný horn að líta fyrstu vikurnar í nýju starfi. Hún mun þó búa vel að langri starfsreynslu sinni hjá félaginu, en Guðrún hóf fyrst störf á skrifstofu Verkalýðsfélags Suðurlands árið 2002. Meðal verkefna sem Guðrún hyggst leggja aukna áherslu er bætt vinnustaðaeftirlit, efling trúnaðarmannakerfis félagsins og aukin upplýsingagjöf til félagsmanna. Starfsgreinasambandið býður Guðrúnu velkomna í formannahóp sambandsins og hlakkar til samstarfsins á komandi árum og þakkar í leiðinni Má Guðnasyni fyrir farsælt samstarf í gegnum tíðina. [caption id="attachment_53695" align="aligncenter" width="300"] Fyrrverandi og nýr formaður Verkalýðsfélags Suðurlands[/caption]