Samninganefnd Starfsgreinasambandsins hélt fund í dag þar sem farið var yfir stöðuna en eins og alkunna er runnu samningar út um síðustu mánaðarmót. Starfsgreinasambandið ákvað á fundi í nóvember að ganga til samstarfs við önnur landssambönd í samningaviðræðunum. Samninganefnd Alþýðusambands Íslands er í forsvari fyrir þær viðræður en formaður Starfsgreinasambandsins, Björn Snæbjörnsson er fulltrúi SGS í þeirri samninganefnd. Á fundinum í dag var ákveðið að halda áfram á þeirri braut að vera í samstarfi við önnur landssambönd í kjaraviðræðunum. Starfsgreinasambandið fer með samningsumboð fyrir 16 félög á hinum almenna vinnumarkaði og hefur lagt fram kröfugerð í þeirra nafni.